政情：田少打保齡寶刀未老
政情：田少打保齡寶刀未老
保齡球係香港常青嘅運動項目之一，富貴黨尋日喺美孚搞咗場青年、商界三人保齡球大賽，前主席田北俊都有現身，仲一時技癢落場，賽前佢表現得好謙，話自己幾十年冇打，點知打完三局，田少勇奪全場單局最高分，果然寶刀未老！
賽前嘅田少都幾緊張，猛話自己讀大學時就成日打，仲自爆以前佢諗咗條縮數，第一球就自己打，然後請槍搵人幫佢執手尾；之後佢又不停問在場邊位黨友有實力，以便同佢拍檔，咁就實掂啦！搵好隊友後，田少就揀番個啱磅數嘅波，兼且練番好個姿勢先嚟真，絕對係一絲不苟。
結果經過一輪激戰之後，田少以一百七十六分力壓其他三十二位對手，奪得全場單局最高分，而佢所屬嗰隊更加唔使講啦，有田少助陣，梗係攞埋全場冠軍啦！
田少碌齡有姿勢有實際，仲勇奪全場單局最高分。