政情：謝安琪玩低調領傑青獎

二○一○年十大傑出青年選舉尋晚喺會展舉行頒獎典禮，好多名人捧場，不過，焦點之一、得獎後爭議不絕嘅歌手謝安琪尋日就玩低調，大會夜晚八點半頒獎，六點半舉行酒會，七點半晚宴開始入席，而謝安琪八點左右至現身，到場後透過大會話唔接受訪問。

其他嘉賓有一班名人評審，如前商務及經濟發展局局長馬時亨、廠商會會長黃友嘉、張國柱同陳茂波兩位立法會議員、行會召集人梁振英等。大會嘅男士嘅dress code一律打黑呔，但肥亨就好有心思，打咗一個好似絲巾嘅新潮煲呔到場。

前環境運輸及工務局局長廖秀冬今次提名咗同樣做環保工作嘅全球氣候行動聯盟中國項目統籌盧思騁，問到冬姑覺得環境局局長邱騰華做成點，佢竟衝口而出話：「我唔知佢做緊咩喎！」盧恩騁聽完即時幫手打圓場，話冬姑好少留喺香港，真係冇留意喎，果然好有默契！

「乒乓孖寶」李靜同高禮澤參加完廣州亞運，特登趕返香港出席頒獎禮，佢哋話以前十年黃金歲月掛住爭獎牌，依家希望抽多啲時間做社會服務，例如教小朋友打波咁。