政情：葉劉發炮鐵頭仁還擊

匯賢智庫創會主席、立法會議員葉劉淑儀磨拳擦掌要成立新政黨，尋日佢出席一個論壇時就大講組黨進程，話新黨會跟進稅務條例，但立法會專長財經議題嘅議員嚟嚟去去得三、四個，應該吸納多啲人才。呢句說話聽喺現屆議員耳中真係唔舒服，出席同一場合嘅白鴿黨主席「鐵頭仁」何俊仁稍後就還火，質疑葉劉入立法會嘅資歷淺，唔知審議條例要乜人才。葉劉個黨都未組成，已經同立會大黨嘅主席鐵頭仁開定火，議會真係從此多事！

稱已羅致多位猛人

葉劉尋日話，已經擇好日子落實明年一月初成立新黨，仲羅致到好多猛人添！佢話，大家聽到個名一定識，但為咗保持神秘同驚喜，點都唔肯事先披露。不過，講到黨嘅路向，佢就好興奮，話本港面對稅基狹窄嘅問題，必須盡快改善。

咁點跟呢？葉劉認為，立法會中專長財經議題嘅議員唔多，嚟嚟去去得三、四個，應該諗方法吸引多啲財經或商界嘅專業人士加入政壇。跟住佢就硬銷個新黨會將檢討稅制納入政綱，即係話，佢個黨梗有呢類人才啦。

營商叻未必熟法律

佢連消帶打，搞到同一場合嘅鐵頭仁唔知好嬲定好笑。事後，鐵頭仁一邊話好歡迎唔同人組黨，走入熱廚房爭餅仔，同時反駁一定要商界人士加入立法會先可以幫手搞好香港經濟嘅說法。鐵頭仁之後以其人之道還治其人之身，揶揄議員資歷淺嘅葉劉唔知立法會之前都審議過好幾條同稅務、財金有關嘅重要法案，仲話叻做生意或商界專才並唔熟悉法律，就算做稅務條例，財經專家都未必夠律師咁有經驗，了解當中嘅法律架構。