昔日太一叮
老實講，香港健兒可以獲得咁嘅成績，確實難能可貴，值得全港市民為佢哋喝采。須知港府孤寒成性，對體育運動極少支持，資助少得可憐，設施嚴重不足，運動員不嬲都要靠自己，憑個人拚搏，逆境自強，奪取佳績，正如孤兒仔出人頭地咁，零舍鼓舞人心o架。
不過咁，港府高官平時對體育唔瞅唔睬，但當運動員攞獎時，佢哋就識得出嚟叨光。所以咯喎，港隊健兒凱旋歸來後，高官一定又會出嚟抽水，乘機硬銷申辦亞運。
講開申亞，真係愈講愈好笑，自從港府推出嚟諮詢，反對聲音排山倒海，一浪高過一浪，大部分民意認為當局應該善用公帑，集中精力改善經濟民生，唔應該搞埋啲勞民傷財嘅政績工程，連保皇黨都企硬反對。不過，港府高官依然唔死心，繼續死纏爛打，一於硬銷到底，甚至不惜割價大傾銷，將直接成本減到六十億。
除此之外，港府官員又呃又氹，一時話搞亞運可以提升香港嘅國際地位，一時話可以創造就業，一時又話如果搞唔成亞運，興建體育設施將會遙遙無期。民政事務局局長曾德成甚至話搞亞運可以鼓勵市民多做運動，身體好啲，連醫療開支都慳番喎。
最搞笑嘅係，電子動態版《清明上河圖》喺香港展出，當局居然喺場外等候區設立影相攤位，叫市民以微笑支持香港運動員，但就喺張相度加上申亞口號，製造市民支持申亞嘅假象，簡直係弄虛作假，強姦民意，叮！
可惜吖，港府動作多多，又呃又氹，到頭嚟都係白費心機。工聯會公布調查結果，九成市民認為申亞對佢哋嚟講唔重要，八成認為就算香港舉辦亞運，亦唔會提高對運動嘅興趣，唔會增加運動時間。調查同時發現，四成八市民每星期運動少過一小時，遠遠低於專家建議嘅每日半小時。
港人少運動，唔係對體育天生冷感，而係搵食艱難，為口奔馳，唔少打工仔日日捱十幾粒鐘，仲邊有時間運動吖。嗱，唔信可以睇吓政府部門嘅外判工，好多人連食飯時間都冇，仲點樣運動呢？
所以話，港府要鼓勵運動，首先要搞好經濟民生，令打工仔收入好啲，生活壓力少啲，大家自然會多做運動。相反，貧窮問題不斷惡化，打工仔日做夜做，連做運動嘅時間都冇，申辦亞運根本就係本末倒置，叫市民點支持呢？叮！
