政情：星爺講風險投資爆笑彈

由香港菁英會一班年輕人落手落腳籌辦嘅第二屆博鰲青年論壇尋日舉行，吸引咗逾一千八百人到場。一如事先預料，全日人氣最旺嘅嘉賓就係「星爺」周星馳，話說星爺一入場，台下即掌聲雷動，連主持人都感嘆掌聲多過特首添！跟住台上四位嘉賓輪住講嘢，未到星爺已經有台下聽眾急不及待遞紙條發問。雖然星爺講Talk好嚴肅，但台下嘉賓有備而來，好抵死咁問星爺點樣做好「風險投資」，事關佢每套新戲都起用新面孔嘅女主角，但套套戲都咁賣座。

呢位鬼馬聽眾言下之意，係星爺發掘嘅女主角經常成為緋聞女友，難怪話音未落，台下已經笑成一片。由於大會唔畀星爺用廣東話回答，所以佢用普通話回答：「選女演員最重要是靚女，還有身材要好！」講完連自己都笑埋一份。

大家咁享受論壇，都係菁英會一班兄弟姊妹辛苦嘅結果。難怪博鰲論壇秘書長周文重喺閉幕式上，話要高度評價菁英會今次嘅成果，仲話希望明年喺度重聚。相信菁英會班成員飲得杯落啦！

講到今次出錢出力嘅菁英會名譽主席信和集團太子爺黃永光，全日愈忙愈開心，原來佢嘅寶貝仔黃家寶今日滿一周歲。點慶祝先？佢話同太太奉行低調，只會喺屋企食餐飯就算嘞！