政情：名人閃爆撐卡地亞
政情：名人閃爆撐卡地亞
有「皇帝的珠寶商」美譽嘅卡地亞，尋晚為中環太子大廈嘅亞洲旗艦店舉行隆重開幕儀式，城中逾百名人冒住寒風撐場，太子珠寶鐘錶主席鄧鉅明夫婦仲為卡地亞做生招牌，兩人齊齊戴上合共逾百萬元嘅卡地亞名錶，踏住紅地氈而嚟，閃爆全場。
鄧鉅明一見到記者就急不及待揭起衫袖露出手腕話：「呢隻（錶）好嘢嚟㗎，約三十幾萬元。」鄧太仲厲害，戴上鑲滿鑽石嘅卡地亞，約值六十幾萬元，閃爍生輝倍添華貴。
港交所主席夏佳理夫婦都嚟湊熱鬧，而全國青聯副主席陳仲尼亦係卡地亞粉絲，拖埋太太齊到賀。在場見到中華總商會榮譽會長霍震寰，講起南北韓緊張局勢會唔會影響營商環境，佢就好淡定咁話：「睇吓港股調整成點咪知囉。」似乎唔多緊張噃。
太子珠寶鐘錶主席鄧鉅明（右）同太太齊齊戴上閃爍生輝嘅卡地亞名錶撐場。