政情：怪醫提質詢為拉生意？
政情：怪醫提質詢為拉生意？
立法會醫學界代表、大腸癌專家「怪醫」梁家騮，今個禮拜起離開服務咗二十幾年嘅沙田威爾斯親王醫院，夥拍骨科醫生哥哥梁家騏開業，齊齊進駐中環做私家醫生，展開人生新里程。無獨有偶，怪醫喺下禮拜三嘅立法會大會上有一條書面質詢，提到大腸癌可能超越肺癌成為頭號癌症殺手，唔通怪醫趁機拉生意？
非也，怪醫係希望搞清楚依家醫管局使用治療大腸癌藥嘅統計數字啫。怪醫喺質詢度提到，依家醫管局用開嘅治療大腸癌吊針藥，病人完成一個療程，前後要留院五百七十幾個鐘，對醫療體系造成負擔，但新嘅口服化療藥可以畀病人喺屋企自己服藥，令佢哋嘅生活更有彈性，所以怪醫想當局做吓統計，到底用舊藥要令病人同醫療系統花幾多時間同成本，用嚟研究轉用新藥嘅可行性，相信同個人執業無關。不過始終瓜田李下，怪醫就呢件事做評論之前，都係申報定利益穩陣啲！