政情：搞搞政：田少出關再戰新界東

富貴黨早前又「家變」，近日傳出前黨主席田北俊重掌富貴黨。其實，田少喺○八年立法會新界東選舉失利而辭任主席以嚟，一直以元老身份領導富貴黨，佢胞弟田北辰退黨，閉關兩年幾嘅田少焗住走出台前，轉用另一個身份帶領個黨，而黨高層亦部署田少出關出戰新界東。

正積極考慮由航運交通界轉戰直選嘅黨主席Miriam劉健儀，曾考慮落戶新界東，若田少全面復出坐鎮，又要喺跌倒嘅新界東企番起身，聽聞Miriam已將直選目光再次投向香港島。至於近年備受黨力捧、第二梯隊中嘅西貢委任區議員「哪吒」方國珊，一直視田少為師傅，若田少出關再戰新界東，相信佢亦願意繼續為田少抬轎助選。

尋日問哪吒點睇田少再戰新界東，佢話依家談論黨內直選布陣言之過早，強調目前最緊要做好地區工作。

Miriam尋日亦話早前研究為田二少度身訂造副主席新職位時，考慮過增設黨魁，只係當時大家覺得手續太繁複而作罷；依家田二少退黨，黨聽日起一連兩個禮拜日開集思會，探討修改黨章，以配合新形勢，好大機會為田少做黨魁鋪路。