政情：長毛亂放箭插張建宗

最低工資二十八蚊提上立法議程，史無前例，商界同勞工界喺議事廳內拚得火花四起，估唔到討論查詢最低工資詳情嘅熱線電話，都可令勞工及福利局局長張建宗同社民連嘅議員「長毛」梁國雄擦出火花。

話說立法會研究最低工資附屬法例小組委員會尋日召開首次會議，張建宗話勞工處有個熱線電話，可以畀老闆同打工仔查詢有關最低工資嘅嘢，仲係二十四小時有人接聽。長毛聽完即刻打去，點知佢投訴條熱線冇人聽，跟住叫助手打去問政府熱線個電話有冇錯啦，得到嘅答案係冇呢條線，長毛於是乘機發難。

喺會上已重複講咗個電話號碼好幾次嘅張建宗，終於忍唔住窒長毛：「（政府熱線）係1823唔係1832，唔怪得之你打唔到啦！」長毛唔死心，喺會上開埋電話個喇叭：「你自己聽吓，打咗十次都係咁，都係叫你按123（冇真人接聽），要指證你講大話！」張建宗今次冇佢咁好氣，長毛就叫埋在場嘅人打去試吓，有人聽嘅話斬自己個頭喎！

我哋打過呢條熱線，雖然要㩒幾個冧巴，但最後有人接聽回答問題，睇嚟長毛要試多幾次至得喇。