政情：劉玉蓮賣設計畀「壞孩子」

奧海城今年首次以印度作為聖誕主題，利用特別嘅鏡面設計、鏡粒同LED燈，模仿世界七大奇景之一嘅泰姬陵，建造一個闊五十三呎、高二十五呎嘅泰姬陵，並舉行連串富印度色彩嘅慶祝活動，包括印度時裝騷。早前佢哋舉行亮燈儀式，身為信和集團商場推廣總經理嘅蘇蔡潔蓮特登以一身印度服飾出現，信和集團總經理余漢坤就帶埋太太劉玉蓮同囝囝一齊嚟玩，余太仲以佢設計嘅絲巾配襯身上嘅印度裝添！

本身係設計師嘅余太，畢業於著名設計學府Central Saint Martins College，佢身上嘅印度絲巾就係畢業展嘅功課，當年仲畀「壞孩子」John Galliano睇中，買咗佢個設計，可惜嗰時只係學生妹嘅佢，冇買番條嚟珍藏。

當年喺英國讀書嘅余太同姐姐，曾經趁放假同兩個朋友去印度旅行，點知第一晚到埗就畀人載咗去山旮旯唔知邊度，好彩最後平安無事，仲玩咗成個月添。雖然旅程有啲驚險，但佢話好回味，等囝囝長大後，會鼓勵佢去旅行見識。