政情：申亞大龍鳳回天乏力

政府申辦二○二三年亞運會嘅諮詢喺十二月一號結束，一直處於極度劣勢嘅政府食住港隊喺廣州亞運取得佳績，出動奪得四金五銀獎牌嘅運動員陣容，現身後日（二十九號）立法會民政事務委員會公聽會，希望呢場絕地反擊嘅「大龍鳳」能夠掀起社會支持申亞嘅聲音。

體育總會空群而出

政府先後出動延長諮詢期同推出縮水版方案兩招，可惜都唔奏效，咁梗係博吓民政事務委員會喺下禮拜一搞嘅公聽會，能唔能夠扭轉局勢啦。公聽會邀請四十個團體同人士出席，當中過半數嚟自體育界，佢哋嘅立場毋須多講，重點係出嚟講嘢嘅人有冇分量。奪得金牌嘅單車運動員黃金寶、王史提芬、陳振興同埋滑浪風帆運動員陳敬然都會出席，銀牌得主有壁球運動員歐詠芝、趙詠賢、陳浩鈴同滑浪風帆運動員陳慧琪，仲有觸動人心嘅「鐵血女車手」黃蘊瑤。

夠唔夠分量呢？仲未夠㗎！前游泳港隊代表蔡曉慧、傷殘運動員蘇樺偉等，同埋十多個體育總會空群而出。擺出咁嘅陣勢，擺明想蓋過建仔、白鴿黨同公文袋等反對聲音。

雖則德成局長想藉住呢班體育界精英現身說法，谷起民意支持申亞，但港隊喺亞運取得佳績後，先有建仔日前喺中委會再討論申亞，結果維持反對立場不變；而工聯會社會事務委員會尋日公布由中大負責嘅民調結果，又再一盆冷水對政府申亞照頭淋。

工聯會民調潑冷水

工聯會訪問咗一千名市民，有超過八成受訪者覺得政府辦亞運唔會提高自己做運動嘅興趣，或者會增加運動嘅時間，明顯係畀政府一記耳光，事關政府成日話辦亞運可以鼓勵市民運動。雖然工聯會社委會副主席麥美娟冇講明反對，但佢哋嘅立場都呼之欲出啦！

老實講，喺咁多政黨反對下，德成局長搞呢場大龍鳳已經冧檔，若果咁好彩畀佢扭轉到局勢，又試問佢攞住嗰六十億元嘅「縮水版」申亞開支，點同其他城市競爭呢？除丟香港人架外，申亞結果都係冧檔。