醫局擺明搵笨 病人唔做老襯

諗縮數氹病人入局，點知陰招畀人拆穿，反而自己丟架，醫管局今鋪偷雞唔到蝕把米，真係瘀到痹咯。

話說醫管局今年三月宣布推出所謂「共同護理計劃」，喺沙田同大埔做試點。千祈咪畀個名呃咗，查實係「陰你計劃」就真。嗱，當局話會向一千個睇開公立醫院專科門診嘅高血壓及糖尿病人提供每年一千二百蚊資助，等佢哋選擇去私家診所覆診，話可以減輕病人負擔，縮短公立醫院輪候時間喎。

有冇搞錯？家陣唔係睇傷風感冒，而係要定期覆診，長期食藥嘅慢性病。一張金牛加兩條紅衫魚，睇幾次私家醫生診金已經使凸，藥費仲未計，搵笨咩！

你精我都精，醫管局諗縮數，市民邊會咁容易上當吖。醫管局資料顯示，參與計劃嘅醫生得三十六位，有團體調查發現，呢啲醫生有近半從未有醫管局病人求診，有五位話自己根本冇參與。雖然有一千名病人獲邀，但實際參與計劃嘅只得三十二人。

叮！計劃無人吼，趁早摺埋罷啦。查實，本報早已經點醒當局，話計劃不切實際，行唔通o架啦。道理好簡單，資助奀到冇朋友，根本微不足道。醫管局曾調查私家醫生收費，如果每年搵私家醫生覆診六次，扣除資助後，病人仲要畀多四千幾蚊。醫管局出豉油，要病人出雞，市民梗係唔做老襯啦！

計劃冇人幫襯，病人最終咪又係去番公立醫院，點縮短輪候時間呀？醫管局使過百萬元推行呢個毫無吸引力嘅計劃，仲諗住擴展到港島，擺到明將公帑揼落鹹水海，倒納稅人米！

叮！醫管局將病人推向私營市場早有前科，弊在試嗰樣衰嗰樣。好似「長者醫療券」咁，每位長者每年得二百五十蚊資助睇私家醫生，睇得頭嚟睇唔到腳，結果使用率奇低，部分私家醫生甚至中途退出。仲有當局前排提出嘅「一人一醫生」計劃，話鼓勵有經濟能力嘅市民選擇一名家庭醫生，仲考慮以健康檢查津貼做招徠，結果未出爐已經惹來唔少質疑。

當局千方百計將病人推向私家醫生，理由無非係公立醫院服務需求愈來愈大，但資源有限。冇錯，隨住人口老化，醫療需求愈來愈大，開支不斷增加。但係，為低下階層提供基本醫療服務，當局責無旁貸。目前發達國家公共醫療支出佔本地生產總值約百分之十，但香港嘅比例不足百分之三，即使增至百分之五嘅國際中等水平，每年醫療撥款亦不過係八百億元，港府完全畀得起。所以話，當局唔係冇錢，而係冇心。

解決問題無非開源節流。計太一叮話齋，最直接嘅節流辦法就係重整架構實行「瘦身」，將諗出「陰你計劃」屎橋嘅庸官炒魷，唔單止市民拍爛手掌，仲慳番一大筆添。叮！