政情：KK廿年前行船去過北韓
政情：KK廿年前行船去過北韓
南、北韓前日爆發激烈炮戰，各國震驚，但工聯會立法會議員KK黃國健就洞悉形勢，話覺得北韓只係「發窮惡」，想爭取多啲國際援助，加上有中國同美國喺當中斡旋，相信南、北韓唔會真係掀起戰幔。
講開先知，KK原來二十幾年前行船時都去過北韓，當時嘅北韓比起依家更封閉，外人好難一睹其廬山真面目。佢話嗰陣覺得北韓好落後，好多日用品都好缺乏，永遠買唔到嘢，但街道井井有條，一舊垃圾都冇。好笑嘅係，當時喺市面見到包裝得靚啲嘅商品，全部都唔畀賣，搞到佢最後乜都買唔到。
雖然當地局勢咁緊張，但白鴿黨副主席劉慧卿就冇有怕喎，會按照原訂計劃星期日飛去南韓首爾出席國際婦女會議。咁卿姐有冇買重保險、以防萬一先？點知一向精明嘅佢竟然糊塗一時，話完全醒唔起要買保險，會即刻補買咁話！