政情：北京市長搭港鐵偷師
政情：北京市長搭港鐵偷師
北京市市長郭金龍尋日率領一班官員來港出席「第十四屆北京香港經濟合作研討洽談會」，期間花咗四十分鐘「旋風式」參觀港鐵，順便偷吓師。
郭市長一行人喺港鐵行政總裁周松崗等港鐵高層陪同下，首先參觀咗機場快綫香港站，睇吓港鐵點樣為旅客預辦登機手續，之後又親身試搭機場快綫列車，由香港站搭到青衣站，仲喺青衣站港鐵上蓋物業盈翠半島嘅平台逗留一陣，似乎有所領會噃。原來郭市長對港鐵嘅「鐵路加物業」綜合發展模式留下深刻印象，睇吓日後返到北京可唔可以引入呢個結合鐵路同物業同時發展嘅概念，地盡其利。
郭金龍（中）喺周松崗（右）陪同下，旋風式參觀港鐵，對青衣站嘅「鐵路加物業」綜合發展模式印象深刻。