政情：搞搞政：最低工資以和為貴

立法會研究最低工資附屬法例嘅小組委員會今日開鑼，截至尋日，共有二十一名議員加入，以勞工界同基層議員最疊馬，工聯會、勞聯、職工盟同街工等共九人，工商界有五人，好似香港總商會嘅代表林健鋒、工業總會代表梁君彥同飲食界代表張宇人等。勞工界姿態上企硬爭取三十三蚊，商界就堅持二十八蚊都太高，破壞營商環境，兩邊陣營為向選民交代，駁火嘅激烈程度預計不亞於之前審議最低工資條例草案委員會。

本港首個最低工資定喺二十八蚊，小組委員會必定成為戰場，今日會議首個議程就係選主席，呢一步棋，政府亦不容有失。據悉，政府官員近日向建制派埋手，游說由有工聯會背景嘅建仔主席譚耀宗出任主席，指主席位置敏感，手握決定議程優先次序同控制會議進程嘅權力，若由勞工界坐，商界一定反枱唔制，如由商界嚟做，勞工界又唔放心，搵角力較中立嘅譚Sir做主席，咁就雙方都可以接受，以和為貴喇。