政情：IQ博士台灣淵源深

由本港台商為骨幹嘅商界聯誼組織「神仙．老虎．狗」前晚搞咗個聚會，見到立法會議員「IQ博士」黃宜弘，佢話同台灣好有淵源，事關佢已故父親黃克立係抗戰後嘅首任台中市長，所以佢同台灣關係好好，有好多台灣朋友，好似同呢個聯誼組織嘅創會會長Jenny盧文韻相識幾十年。IQ博士又話自己生肖屬老虎，係呢個組織嘅榮譽會長。

當晚機場管理局行政總裁許漢忠都喺度，佢娶咗個台灣太太，眾人稱呼佢係台灣女婿。原來佢生肖都係屬虎，襯晒呢個組織嘅名稱。許漢忠笑稱，同IQ博士相比，佢係細兩個圈嘅老虎仔喎，哈哈！

講起「神仙．老虎．狗」改名嘅典故，原來都幾搞笑。現任會長亞洲聯合財務公司老闆長原彰弘話，約十年前，佢哋一班志同道合嘅台商同香港商界朋友經常聚會，當時好多成員都屬狗或老虎，好似派駐香港嘅中華旅行社前總經理鄭安國就係屬狗，所以一於改咗個咁盞鬼嘅名。