政情：帳委會零代表白鴿變塘邊鶴

政府近排力推中學縮班，好多家長都諗住將仔女送入直資學校，點知直資學校都爆煲，帳目愈查愈混帳。直資學校尋日反咬政府指引唔清晰，所以審計署對佢哋嘅批評係唔公道，擺明係想將責任推番畀教育局，點知教育局局長孫明揚尋日都以立法會政府帳目委員會將進行調查為由，表示唔再講嘞，互相卸責。

呢單嘢除咗令一班家長激心外，白鴿黨核心兼立法會教育界代表張文光愈睇愈嬲，尋日力數教育局管理失當，混帳程度令人不能接受，睇嚟下星期一帳委會進行公開聆訊時，尤其孫公之前話會交代直資學校混帳嘅資料，咁張文一定會為家長出番口氣喇！點知張文聽到後一臉尷尬。

點解？原來經歷早前白鴿黨喺政改方案轉軚一役後，白鴿黨唯一一個喺帳委會嘅代表鄭家富都已經退咗黨，令堂堂泛民主派第一大黨變咗做塘邊鶴，只可以喺外邊呱呱叫。真係唔知白鴿黨主席「鐵頭仁」何俊仁點同選民交代？

無謂打攪鄭家富

帳委會係立法會其中一個常設委員會，泛民同建制雙方都有不成文協議，每屆立法會開始前協商好邊個入局，令各黨派都有代表。○八年白鴿黨就推舉鄭家富入去，但當時估唔到佢會退黨，所以依家鄭家富唔代表白鴿黨，咁白鴿黨喺帳委會no say都冇辦法。既然冇份審，張文話惟有列席聆訊，但就要忍口，因為除咗帳委會成員外，其他議員都唔可以提問。

其實一向都有非帳委會議員委託委員提問，張文大可向舊黨友鄭家富埋手吖，唔通退黨就不是朋友？不過，張文話，既然鄭家富已經話自己係獨立議員，就無謂打攪人喇，惟有做隻安靜嘅塘邊鶴算喎！