豬仔輕罰頂罪 淫媒逍遙法外

喺香港，亂拋垃圾也好，違例吸煙也好，定額罰款都係一千五百元，但如果有人違反《本地報刊註冊條例》，而且一次過被控三條罪，你估又會罰幾多錢呢？叮！講都冇人信，總共罰款二千一百元，每條罪只係七百元咁大把，仲未夠違例食支煙仔嘅一半代價，你話係咪兒戲吖！

本報今年六月揭發三份六合彩報《創富》、《六合皇》及《貼士皇》違例偷改承印人資料，負責監管嘅影視處一拖再拖，後來先至交由律政司跟進，警方卒之以「報刊上未有印上承印人名稱及地址」嘅罪名，票控三報嘅出版人「創能有限公司」，但就放生淫賤黎擔任董事嘅承印人「超企印刷及傳訊有限公司」。案件尋日喺觀塘裁判法院提訊，由於證據確鑿，被告公司不得不承認所有三項控罪，其代表大律師話喎，今次係「技術遺漏」。

叮！呃鬼咩，有人鬼鬼祟祟，偷偷摸摸，將三份六合彩報承印人資料改來改去，係人都知其中必有蠱惑喇，所謂技術遺漏，簡直係狡辯。正如學者宋立功所質疑，承印人創能可能係形同「雞棚」嘅空殼公司，隨時只係頂罪嘅「豬仔」，就算今次被判罰，但對將六合彩報走私到內地公然銷售嘅幕後主腦絲毫無損，仍然逍遙法外。

再講喇，三報違例，只係罰雞碎咁多錢，根本毫無阻嚇力可言。立法會議員劉江華就講得啱嘞，市民亂拋垃圾都要罰一千五百元啦，何況係一間公司違法。執業大律師龔靜儀亦認為，呢個罰則係廿幾年前訂落，今時今日等於「飲餐茶」嘅價錢，早就應該修改啦。

其實，應該修改嘅唔只法例，影視處告一間唔告一間，淨係向空殼公司開刀而放過幕後黑手，擺明玩包庇，呢種「一制兩法」更加應該撥亂反正。講開又講，影視處包庇及放生淫賤黎都唔知幾多次咯，早前壹淫媒旗下網站掛羊頭賣狗肉，播放一段所謂「如何自行檢查乳房」短片，被淫審處評為第二類不雅物品，影視處居然講到明唔作任何檢控，包庇包到出晒面。至於咁多年來，壹淫媒違反《淫褻及不雅物品管制條例》而被港府百擒百縱嘅臭史，更加係罄竹難書。

正所謂養淫遺患，港府包庇淫賤黎，唔單止搞到香港亂七八糟，亦累到神州大地烏煙瘴氣。係人都知，淫賤黎旗下公司印製嘅六合彩報，長期被人走私到內地，鼓吹賭風，荼毒同胞，害到無數人傾家蕩產，妻離子散。呢，東莞有個地下六合彩莊家為咗追債，居然明目張膽持欠單到法院，聲稱要控告「下線」欠債，你話係咪無法無天吖。

有人統計過，中國非法彩票市場規模遠遠大於合法彩票，尤其地下六合彩賭額更加驚人。研究彩票問題嘅專家指出，黑彩之所以氾濫成災，皆因刑罰過輕。其實計太一叮話齋，有人暗中包庇先至係主要原因，港英餘孽不斷放生淫賤黎，內地貪官充當六合彩報保護傘，官淫一家，兵賊不分，有乜法子唔禍國殃民吖，叮！