政情：嫻姐無意再入熱廚房

之前盛傳過會重出江湖出選超級區會議席嘅工聯會陳婉嫻尋日又同大家見面，但唔係參加政治活動。

嫻姐長年為勞工爭取權益，嶺南大學為表揚佢對勞工運動嘅貢獻，尋日頒授榮譽院士銜畀佢。佢話自己冇做立法會議員以嚟，唔使畀各個會議纏身，多出嘅時間可以繼續為勞工謀福利，愈做愈起勁，雖然確實有好多朋友都叫佢去選超級區會，但佢就話依家再入政圈熱廚房嘅機會唔大喎！但政治一日都嫌長，遲啲又有新形勢時，嫻姐可能又有新諗法呢！

馮孝忠同嶺大有淵源

同樣獲頒榮譽院士銜嘅仲有恒生銀行總經理馮孝忠。唔講唔知，馮孝忠原來同嶺大好有淵源，以前佢一直都未做過金融行業以外嘅公職，直至政府○三年委任佢做嶺大校董會成員，一做六年。佢話做校董期間一直見住班職員為學生奔波勞碌，令佢深深感動，所以今次獲頒榮譽院士銜，能夠繼續同嶺大有一分連繫，就零舍覺得高興！