政情：搞搞政：克勤仔重金買舖收租

好多「80後」都呻上車難，但立法會議員陳克勤早就係「有殼蝸牛」，即係有樓之人，最近仲榮升包租公添！三十出頭嘅克勤仔做咗議員兩年幾就有樓有舖，真係恨死隔籬。

克勤仔喺今個月頭交畀立法會嘅利益申報顯示，原本只有新界馬鞍山一項物業嘅佢，突然添多咗一項九龍物業，而且係以公司名義持有。佢笑笑口咁話，前排女友同朋友睇到一個深水埗舖位值得投資，於是慫恿克勤仔出手，佢諗過同朋友聯名買咗間舖就算，不過小心駛得萬年船，最後決定用公司名揸住間舖，大家五五分帳唔使拗，卒之喺八月完成交易。

呢個舖位有成一千五百呎咁大，家陣租緊畀人做食肆，仲有成兩年租約。我哋上網搵過，類似嘅舖位由五百幾萬元至過千萬元不等，克勤仔果然係有米之人。佢話間舖按咗七成，佢同朋友每人每月夾兩千蚊就夠供，而食肆租金都頂得住供款，仲諗住做長線投資。

政府啱啱先出手打擊樓市炒風，但只係針對住宅，商舖唔受影響，睇嚟克勤仔實有賺啦！不過佢都幾小心，冇畀租客知道有位議員做包租公，費事麻煩。