政情：中總反枱回擊競爭法

香港總商會同廠商會早有風聲傳出，分別成立專門委員會，閂埋門研究競爭法嘅種種弊端，向政府提反建議，而一向最撐政府嘅中華總商會，一直持觀望態度，按兵不動。但消息指競爭法對商界影響太大，中總無法獨善其身，最近已經成立專責小組，研究點樣同政府打呢場硬仗，初步計劃仲會聯合其他如中華出入口商會等大大小小過百個商會組織一齊行動，真係唔聲唔聲嚇你一驚，殺當局一個措手不及。

做推銷員嘅商務及經濟發展局副局長蘇錦樑雖然出身愛國愛港陣營，但呢個政治背景似乎已失護身符作用，家陣連中總都出嚟反枱，本身係基督徒嘅蘇錦樑，真係要晚晚祈禱，求神保佑至得嘞。

同蘇錦樑分屬建仔黨友、中華出入口商會喺立法會嘅代表「象哥」黃定光，尋日講起競爭法亦話：「商界要個橙，政府畀個爛蘋果我哋！」佢指條例無法打擊壟斷現象，好似超級市場、燃油同航空公司咁，反而仲容易令中小企中招，真係「魔鬼在細節」。

聞說中總專責競爭法嘅小組早前開首次會議，亦有請蘇錦樑出席，事後有商界好友致電蘇錦樑，提醒佢外面「風大雨大」，推競爭法時唔好搏到咁盡，以免搞到自己周身蟻，最白嗰句係：「政府有好嘢都唔會益你啦！」唔知蘇錦樑聽唔聽得明呢？