政情：扮嘢文捱義氣玩機動遊戲

每逢海洋公園有記招，又係主席「扮嘢文」盛智文出嚟扮嘢嘅機會，但尋日海洋公園介紹新機動遊戲「翻天覆地」，佢竟然爆冷唔扮嘢，原來佢要負責一樣比扮嘢更難嘅苦差，就係同班「80後」、「90後」大玩機動遊戲。

扮嘢文自爆咁大個人從來未玩過機動遊戲，今次為咗幫海洋公園宣傳，捱義氣獻出第一次。佢都有邀請記者玩埋一份，但見到呢個機動遊戲不停咁fing，上到半空成個人倒轉，當堂心都離埋，即刻婉拒佢嘅好意。

扮嘢文話聖誕前會去成都主持成都蘭桂坊開幕，嗰度係扮嘢文近年精心傑作，成個區面積達四十五萬平方呎，比中環蘭桂坊大十八倍，半空有個巨型玻璃天幕，串連區內十九幢建築物。成都蘭桂坊已陸續有香港食肆進駐，仲不時有戶外表演，酒吧餐廳晚晚爆棚，已成為成都至潮嘅蒲點。

從來未玩過機動遊戲嘅扮嘢文，為海洋公園獻出第一次，佢話玩完仲feel到個胃不停咁fing。