政情：建仔新星赴台灣偷師

呢排台灣政壇熱烘烘，五都選舉進行得如火如荼，建仔一班直選新丁，上禮拜五由副主席阿Ann蔣麗芸同張國鈞帶隊去台灣偷師，返港後尋日率先同傳媒分享「戰利品」，除咗一大堆選戰紀念品外，最珍貴梗係見識到藍、綠陣營鋪天蓋地嘅選舉宣傳攻勢啦。

建仔考察台灣五都選舉，被視為黨內部嘅「新星特訓團」，多名團員均屬近年力捧新星，好似尋日見記者嘅，除咗阿Ann外，仲有喺二○一二年好大機會出選立法會嘅張國鈞、沙田區議員EQ葛珮帆同黃大仙區議員陳曼琪。

幾位直選新丁話，台灣容許候選人賣紀念品，衍生出一個龐大產業，好似印有候選人相片嘅汽水機，顧客大排長龍，港府成日話鼓勵創意產業，係咪應該首先考慮吓放寬不必要嘅限制呢？台灣規定投票前十日唔畀發放民調，以免影響選情，佢哋都會研究，再向港府建議係咪應該倣效。

左起：陳曼琪、張國鈞、蔣麗芸同葛珮帆好欣賞台灣嘅選舉紀念品，仲掃咗唔少返嚟。