政情：丹麥王子參觀環保貨船
政情：丹麥王子參觀環保貨船
貨櫃船使用重油行駛會不斷釋放二氧化硫，影響空氣質素。智庫組織「思匯政策研究所」喺今年九月至今協助十七間嚟自香港定期班輪協會嘅航運公司簽訂「乘風約章」，承諾兩年內進入本港海域停泊時，改用低硫燃料，當中馬士基（中國）有限公司斥資一百萬美元，承諾兩年內，抵港停泊嘅貨船轉用低硫燃料，成為全亞洲首家轉用低硫燃料嘅船公司。
訪港嘅丹麥王子Joachim同環境局局長邱騰華，尋日就到船上視察運作情況，對航運公司主動參與改善空氣污染問題感到開心，Joachim王子同時對船上轉用嘅燃料設施感到好奇。
馬士基華南區域銷售高級總監霍滿挺話，抵港停泊嘅貨船轉用低硫燃料，估計可減少八成二氧化硫排放，佢哋仲會建議港府盡快立法限制貨船使用低硫燃料添！
左起：丹麥王子Joachim、邱騰華同霍滿挺參觀船上燃料設施。