政情：象哥李宗德讓座年輕人

好多政黨都話要年輕化，連商會都唔例外，好似香港中華出入口商會咁，近年嚟吸納咗唔少年輕新血，而喺下月中嘅換屆改選中，破天荒有好多年輕會員爭上位，競逐會董職位，正所謂僧多粥少，肯定打崩頭。

免打殘新血雄 心

中華出入口商會現屆領導層下月底就會任滿，根據會章規定，現任嘅八十五個會董將會自動成為新一屆嘅會董候選人，除非佢哋主動話放棄參選，否則仍然會擺入候選名單內。

身兼副會長嘅立法會進出口界代表「象哥」黃定光話，今次換屆選舉有好多年輕嘅會員競逐會董職位，估計喺差額選舉下，當中有十幾個年輕會員會敗北，佢擔心因為咁而打殘班年輕人協助會務發展嘅雄心，搞到佢哋意興闌珊嘅話，對個會嚟講就好傷嘞。

點樣留住呢班新血呢？象哥都爆頭，因為太逼近改選，根本趕唔切修訂會章加多啲會董職位，咁唯一可以做嘅就係讓位，所以佢同會長李宗德都已經唱開晒話會棄選，藉此騰空多啲會董位畀班年輕人。

得嗰兩個咁大把？當然唔夠啦！象哥話會董當中有唔少屬於元老級，佢哋唔做會董後，依然有好大影響力，但依家又過咗申報棄選期限，所以希望勸掂多啲元老出嚟叫人喺換屆選舉時唔好投佢哋票，等佢哋自然落敗，再讓多啲位出嚟，畀多啲年輕人上位。

四大熱爭選會長

除咗會董之外，商會會長一職嘅競逐都相當激烈，現時副會長莊成鑫、鄭啟明同副秘書長李秀恆都係大熱人選，但原來三爭一都唔止，連唱《我的中國心》唱到街知巷聞嘅副會長張明敏，都有機會插隻腳落去選。雖然呢四個係大熱人選，但仲有暗湧㗎，隨時又會殺出程咬金，所以變數仍然好大。