政情：伍穎梅入醫局再拍肥胡

醫管局頻頻換血，繼行政總裁換人後，董事局最近亦加入三名新成員，包括前立法會秘書長馮載祥（Ricky）、九巴董事伍穎梅（Winnie）同國泰航空企業事務董事莊偉茵，下月起生效，任期兩年。

馮載祥莊偉茵經驗夠

Ricky做咗立法會秘書長十四年，同各黨派嘅立法會議員交過手，公關手腕爐火純青。國泰大公關莊偉茵公關經驗一樣豐富，啱啱上月先至解決一單棘手投訴，就係立法會議員詹培忠喺加拿大溫哥華機場搵唔到機位返香港，莊偉茵事後喺電話解畫解釋事件，等金勞詹順番條氣。至於Winnie就擁有豐富嘅企業及行政管理經驗，而且仲係醫管局主席胡定旭領導嘅智經研究中心理事，今次入局，又可以同肥胡拍檔嘞。

另外，政府尋日亦委任咗社會福利諮詢委員會六個新成員，包括協成行集團董事總經理方文雄、律師陳美蘭、葉恩明醫生、聖公會福利協會副總幹事文孔義、香港真光中學校長杜子瑩，以及會計師楊傳亮，下月起生效，任期兩年。