政情：搞搞政：吳斌甫退位指手畫腳

官場一向有不在其位、不謀其政嘅講法，不過，好多退下火線嘅人，都未必受得到寂寞，好多人更放唔低，誓要差隻腳落去。好似前個人資料私隱專員吳斌咁，佢以前做緊專員時，成日自嘲「無牙老虎」，指摘政府唔放權，退位之後，佢就趁立法會研究私隱條例工作嘅機會，提交意見書繼續狠咬政府，雖然插嘅通通都係舊料，但佢好明顯不吐不快。

吳斌嘅意見書話，自己係○七年私隱專員公署提交嘅檢討報告始作俑者，加上對私隱問題嘅關注，所以交份意見書畀立法會。佢講到自己對個人敏感資料、公署調查權同執行通知書呢類技術問題嘅回應，但結論卻係政府做得唔夠，令佢失望之類，又促請政府要再做多啲。

咬住林公公唔放

佢係前任專員，對相關問題嘅了解一定多啲，但卸任冇耐就咁樣說三道四，指指點點，有違官場嘅慣例，而且佢嘅目標由始至終都係政府，唔通要同負責檢討私隱條例嘅政制及內地事務局局長林公公繼續鍊過？