政情：富貴黨地震 Miriam暈一暈

曾經風頭一時無兩嘅富貴黨近年黨爭頻頻，尋日常委田北辰都宣布退黨，好聽啲就話同黨友張宇人喺大家樂罷食立場上現爭拗，實際上係咪被黨逼走，大家心知肚明。

田二少廿蚊張各不相讓

尋日佢哋揀定下晝四點十五分開記者招待會，幾乎撞正財爺出招壓抑樓市，跟住又有金管局收緊按揭，搞到富貴黨呢宗黨爭醜聞有咁低調得咁低調。田二少之所以退黨，據講大家樂事件係導火線之一，黨內骨幹成員一直不滿佢自以為是，多次毫不留情咁公開批評黨友言論亦係肇因之一，傳聞廿蚊張以退黨脅迫田二少退黨。呢單事件唔多唔少都令人聯想到當年嘅九鐵兵變，時任九鐵行政總裁嘅黎文熹等人不滿田二少作風，甚至出現部門主管晒馬逼宮嘅場面，至今仍歷歷在目。

富貴黨地震，撞啱尋日下晝深圳都有地震，我哋喺立法會問好多內務委員會成員，大部分議員都話感覺唔到，唯獨富貴黨主席劉健儀（Miriam）話：「當時覺得震一震，自己就暈一暈，維持咗幾秒，仲以為自己精神唔係太集中添！」我哋打趣咁問佢係咪因為個黨地震呀？Miriam哈哈笑兩聲話：「係發生咗啲事啫！」