政情：暴瘦陳振聰出席弟婚宴

捲入已故華懋集團主席龔如心遺產案嘅商人陳振聰，上月返警署報到時已經暴瘦，尋日佢胞弟陳振鴻（Bobby）喺港島香格里拉酒店香島殿擺婚宴，筵開約二十席，陳振聰帶同太太譚妙清同細仔現身，陳振聰依然一副暴瘦look。佢解釋，清減咗係因為有健身keep fit，經常喺屋企跑步，希望身體健康啲喎。

尋日下晝五點幾，新郎哥Bobby乘坐一架七人豪華Van抵達酒店，佢見我哋在場顯得好愕然，想落車但又縮番入車，最後都落車步入酒店。我哋恭喜佢，又問佢胞兄陳振聰會唔會到場時，佢面有難色，話唔係咁清楚。不過，傍晚六點幾，陳振聰就同太太等到場，見佢一臉笑容。陳家三弟陳振田同四弟陳振國都有出席婚宴，婚禮由律師黃國桐主持證婚儀式。

陳振聰冇露面一個月，問佢點解近期咁少曝光，佢就話：「唔係，都有成日出去食吓嘢嘅！」佢為弟弟成家立室感到高興，問佢送乜嘢禮物畀弟弟，佢就話係秘密，希望留番個驚喜畀弟弟喎。龔如心遺產案上訴聆訊將喺下年一月進行，問陳振聰心情如何，佢都係嗰句，以平常心面對。獲邀賓客當中，包括曾經喺遺產官司中代表陳振聰嘅律師麥至理，仲有已離開宏霸數碼嘅周白瑾。