政情：嚴迅奇為生計唔做畫家？

嚴迅奇係唯一一位獲邀設計三個西九文化區概念圖則嘅港產建築師，佢透露細細個已經好鍾意畫畫，仲被指好有藝術天分，點解最後做咗設計師而唔係畫家呢？因為成日有人警告佢，畫家搵唔到食囉！

最新一期嘅中文大學新聞與傳播學院學生刊物《Varsity》，專訪咗呢位本土建築師，揭開佢鮮為人知嘅一面。嚴迅奇話自細愛好藝術，經常設計聖誕卡、目錄冊等，展現天分，但身邊人士就不停警告佢，話「畫家永遠都搵唔到食」，真係幾冇癮。最後嚴迅奇果然冇做到畫家或者設計師，反而揀咗做建築師，莫非係向現實低頭？嚴迅奇解釋話，自己只係唔想做純設計師，希望結合藝術同環境科學，透過建築設計，實際解決人民嘅生活問題。

講到西九概念圖則，嚴迅奇話好慶幸自己係唯一嘅本地薑，相信自己會更加了解本土居民嘅需要同城市空間，仲認為自己嘅設計方案最大賣點就係簡樸同實用。