政情：葉劉攬人仔抗通脹

美國推出次輪量化寬鬆措施（QE2），搞到全球有熱錢危機，政府尋日都要出招壓抑樓市，不過資產價格上升搞到百物騰貴，連政府都冇符。小市民唔想身家被通脹蠶食，惟有諗計對抗通脹。舊時嘅人會儲糧儲物資，今時今日就有經濟學家教人買人民幣產品保值兼增值。匯賢智庫立法會議員葉劉淑儀係人民幣擁躉，早早開定幾個人民幣戶口兼買埋人民幣壽險，攬住咁多水泡，佢就梗係唔驚通脹啦！

開三個戶口加快兌換

葉劉話，佢開咗三個人民幣戶口，有需要嘅可以再開多啲。點解要開咁多個？因為本港銀行人民幣戶口有交易限額，每日只能夠買賣二萬蚊人民幣，開幾個戶口可以增加每日買人民幣嘅限額，盡快將錢轉為人民幣。佢仲話，將鬆動嘅現金轉為人民幣，既可以坐擁人民幣嘅高息，又可以賺升值，比起揸貶值嘅港幣好得多。

除咗轉揸人民幣外，葉劉仲有買定人民幣壽險呢招絕招，做過高官嘅佢對金融同相關產品有唔少研究，雖然人民幣保單係新事物，但佢對呢類保單已經如數家珍，仲話市面有兩大類人民幣壽險計劃，一種係賠償金額高，但儲蓄成分少；另一種就啱啱掉轉，儲蓄佔咗大部分。葉劉買咗儲蓄成分佔較大嘅計劃，保值之外，仲有分散投資同風險嘅作用。

料港推更多人仔產品

唔講唔知，精明嘅葉劉早喺兩年前已經開始買人民幣相關產品，佢認為，本港會重點發展人民幣離岸中心業務，將來會有更多人民幣金融產品推出，市民手上揸多啲人民幣，將來投資呢啲金融產品都會方便啲，所以佢會繼續儲人民幣對抗通脹！