短打長擊：薄了燒餅 瘦了油條

內地柴油荒，影響各行各業運作。有食物批發商指出，因為入油費時（實情係短缺冇得供應），拖延來貨時間，運輸成本激增，進一步加速物價攀升，糧油雜貨的批發價會於下月加價百分之五至十。

內地十月份居民消費價格指數同比上漲百分之四點四，主要食品價格上升百分之十點一。物價急漲至失控，通脹愈來愈嚴重，搞到國務院也表示要出招，以便控制食品價格。

想不到「國家富強了，人民幸福了」，如今並非戰亂時期，但通脹竟肆虐到如此田地。抗戰時期，重慶物價暴漲，產品偷工減料，連燒餅、油條也紛紛漲價。當年《新民報》編輯程大千將一條物價飛漲的新聞，仿宋詞「流光容易把人拋，紅了櫻桃，綠了芭蕉」，擬了一條標題：物價容易把人拋，薄了燒餅，瘦了油條。

「薄了燒餅，瘦了油條」，亂世求生，百般無奈。百姓日常的平價食品也被偷工減料，可見民不聊生也。香港的太太少奶們或許會叫好，因為食少啲可以喼弗纖體瘦身！即使薄了荷包，但只要瘦了腰肢，靚就得啦！

亂世仍有閒情，通常是食飽無憂米的達官貴人，一般市民，則備受通脹之苦！啲錢係咁貶值，食物價格係咁飛升，一來一回，條數好襟計。

國家領導人起碼都會走訪吓超市，去吓社區，考察吓物價；反觀香港的高官，依然好整以暇看雲舒雲捲，一味口噏噏甚麼適當時候會出招，幾時出就唔話你知，扮晒大內高手，實則盲拳都唔識一套！