政情：饒老捐書畫籌款救敦煌

國學大師饒宗頤德高望重，早前有五百位嚟自世界各地嘅名人學者遠赴敦煌慶祝佢老人家九十五歲大壽，期間掀起一股保育敦煌石窟熱潮。當日嚟自香港嘅三十幾位團友，回港後迅即發起成立「香港敦煌之友」組織，籌款協助敦煌研究院保育敦煌石窟，饒老擔任榮譽主席。

組織尋日成立，並舉行展覽同籌款晚會。饒老透過創會會長、港大專業進修學院院長李焯芬轉述，話一生人從未攞過自己啲書畫出嚟拍賣，笑言今次等於將自己嘅「第一次」獻畀敦煌。饒老嘅「第一次」相當搶手，十一幅書畫共籌得八百六十萬元，而連買枱全晚共籌得一千三百二十一萬元，所有善款會供敦煌研究院用於敦煌石窟壁畫數碼化、保護維修工程同敦煌獎學金等計劃。

成員之一嘅新世界中國實業項目董事總經理紀文鳳話，敦煌共有四百九十二個較為完整嘅石窟，佢哋初步目標希望籌得一千四百萬元，先行維修其中一百五十個石窟，其他石窟維修費會繼續募捐。佢又話計劃下年再搞一次敦煌團，希望再度掀起保育敦煌石窟熱潮。