政情：范太斥洩密人大幫倒忙

早前港區全國人大代表聯署，為被內地判刑兩年半嘅「結石寶寶之父」趙連海求情，事件鬧出洩密風波。全國人大常委范徐麗泰睇唔過眼，尋日幫發起人羅范椒芬「捉鬼」。

據悉，尋日出席人大例會嘅二十幾名人大，當私下坐埋一枱傾偈時，有唔止一人批評不滿同僚中有人對傳媒洩露為趙連海求情信內容，做法好有問題。

事實上，范太喺開會前已公開「捉鬼」，指人大之間早有協議，聯署信內容唔可以公開，就連聯署名稱都要保密，以免唔願意聯署嘅同僚承受輿論壓力，點知禮拜一送出聯署信後當晚，已經有電台烽煙節目能夠喺大氣電波讀出聯署信嘅初稿內容，仲噏得出其中八個冇份聯署嘅人大名字，顯然同僚之間有內鬼。

范太形容今次洩密事件係「好不幸」，洩密者身為人大，理應比一般人明白國情，將聯署信公開，等如將事件政治化，令內地當局誤以為港區人大想攞威貪功，向內地施壓，咁就對幫助趙連海件事有害冇益嘞，普通市民就話唔明呢個道理啫，港區人大都犯下咁嚴重嘅錯誤，攪亂個局，洩密者簡直係缺德呀！

工聯會黃國健亦話范太縱然有火，都冇喺會上質問邊個係「鬼」，只提醒大家第日真係唔好咁做嘞。