政情：德成局長立會辯論玩失蹤

立法會九龍西直選議員「鼠王芬」梁美芬本來抽中喺前日嘅立法會大會上，動議辯論佢最關注嘅西九發展，但由於中途殺出個釋放趙連海嘅休會辯論，令佢嘅動議順延到尋日朝早。咁啱尋日係佢牛一，點知畀民政事務局局長曾德成贈「慶」，激到鼠王芬紮紮跳！

話說立法會尋日繼續討論釋放趙連海嘅議案，傾咗個半鐘後，終於輪到等咗成日嘅鼠王芬「大顯神威」。不過負責回應嘅德成局長竟然遲遲未見人，最後喺金融服務界代表詹培忠提醒下，大家仲要被迫休會等佢嚟。

唔少議員事後都議論紛紛，有人批評德成局長失職，有人就話佢唔尊重立會，直言佢應該早啲嚟準備至係。德成局長最後喺立會休會十分鐘後終於現身，鼠王芬喺會上坦言要求佢盡力回應大家嘅意見，以彌補佢遲到嘅過失。最後立法會亦順利通過由鼠王芬提出嘅動議，咁條氣都順啲。