政情：搞搞政：邱騰華卸責區會遮醜

邱騰華上場做環境局局長後，騷做過唔少，但政策就幾乎推乜衰乜，尋日佢出席十八區區議會正副主席每月例會，唔通係推銷十八區都有焚化爐？

環保基金零宣傳

據聞，邱騰華係去推銷環保及自然保育基金，但班正副主席全部O晒嘴唔知乜事，跟住邱騰華竟然惡人先告狀，話睇番紀錄只有兩個區議會曾申請基金撥款搞活動，似乎唔多踴躍。

老實講，政府喺○八年嘅施政報告宣布注資十億元成立呢個基金，而早前公布嘅施政報告再預留五億元，聽聞基金依家仲有五千萬元未使晒。邱騰華係咪急於要使晒呢筆錢再攞新錢，所以要焗啲區議會申請呢？

邱騰華咁講，好似十八區區議會老奉要撐政府咁，仲畀佢咁噴法，部分區議會正副主席會覺得被屈。據悉席間唔少主席都話從來唔知有呢個基金存在，邱騰華轄下嘅環保署官員不時列席區議會會議，但隻字都冇提過，咁佢哋當然冇申請啦。

嗱！好明顯邱騰華同佢班手下喺區議會「零宣傳」啦，咁又點可以怪啲區議會唔踴躍呀？唔想畀人屈，當然要畀番啲顏色邱騰華睇。據聞，有區議會副主席即場叫政府出封信畀各區議會，詳盡咁介紹呢個基金詳情。