政情：田二少中聯辦密斟45分鐘

港區全國人大代表尋日喺中聯辦開例會，最近成為政壇焦點嘅富貴黨內訌風波主角田北辰都有出席，會議喺下晝五點開始，但佢四點零十分就入咗中聯辦，足足四十五分鐘，佢喺中聯辦做乜嘢？見咗邊個呢？

富貴黨內部就功能界別同直選路線之爭升級，迫使中常委田二少提出退黨，禮拜一傍晚田二少、胞兄田北俊同主席Miriam劉健儀等進出中聯辦，風波疑經協調後暫告平息。事隔兩日，田二少喺人大例會前提早四十五分鐘再踏入中聯辦，惹人遐想。

記者諗住可以向田二少求證內訌風波細節，點知佢「有入冇出」，靜雞雞用秘道離開，避開傳媒，而同屬港區全國人大嘅Miriam更加進出都用秘道，兩人擺明封口。