政情：醫局20周年五代同堂
政情：醫局20周年五代同堂
醫管局尋日喺會展盛大慶祝二十歲生日，有一千五百名賓客參與，首任主席「大Sir」鍾士元同「金刀梁」梁智鴻等五任主席齊現身。醫管局主席胡定旭猛話好開心，因為見番好多老朋友，仲拍心口話，電影《歲月神偷》入面愛心欠奉嘅醫院片段唔會再現。
晚宴有好多稀客現身，令人感覺好似穿梭緊時光隧道。好似九十年代分別係衞生福利司同副衞生福利司嘅黃錢其濂、李麗娟，佢哋兩人係舊拍檔，又有份見證醫管局嘅成長，難怪一見面就雞啄唔斷。
醫管局五任主席共聚一堂，輩分最高嘅梗係大Sir啦！佢係醫管局嘅開荒牛，因年事已高，行動不便，但幾位後輩主席好似金刀梁、肥胡都陪伴在側。問大Sir當年籌備醫管局嘅苦樂，佢話太多嘞，點講得晒！
喺咁多前輩面前，新任醫管局行政總裁梁栢賢即時顯得特別後生，難怪佢對記者自嘲：「我係新人！」
大Sir（左二）行動不便，金刀梁（左一）、肥胡（中）在旁攙扶，右一、右二為李麗娟、梁栢賢。