政情：民協社企咖啡店等運到

雖然民協近年集中火力搞社企，可惜最終都難逃蝕本嘅命運。難得佢哋屢敗屢戰，幾個月前仲喺紅磡開咗佢哋首間咖啡店，大搞新意思，希望可以殺出條新血路。

民協呢條社企路都相當崎嶇，做三行初期，畀自己友官世亮穿櫃桶底，仲鬧上法庭；按摩生意又因為牌照問題而做唔嚟；最慘係連同清潔公司嘅生意，通通至今都未回本。民協立法會議員KK馮檢基尋日大呻，政府淨係喺「伙伴倡自強」基金度撥款畀佢哋創業並唔足夠，應該推出一啲相應嘅政策，兼畀多啲生意社企做，佢哋先有生存嘅空間。

咁今次搞咖啡店又點呢？民協總共喺政府度攞到七十二萬元撥款嚟搞，裝修已經使咗三十萬元，計埋每月二萬一千蚊租，每月要賣幾多杯咖啡先回到本，相信大家有數得計。KK就話已經度好晒橋，未來將會邀請中醫師同喺觀塘相當出名嘅「蛇王標」嚟舖頭分享食療同烹調妙法，又唔排除自己會落舖親自沖咖啡。大家不妨放長雙眼，睇吓民協能否打破宿命。