政情：未掌勞工處 卓永興周身箭

無論係以前做勞工處處長、依家升咗級做勞工及福利局局長嘅張建宗，定係接佢手做處長嘅謝凌潔貞，同各工會嘅關係都好好，甚至可稱為「工會之友」，但候任處長卓永興就被鬧爆！

出名同工會關係惡劣

卓永興之前做食環署署長嗰時已經出咗名同工會關係惡劣，早前坊間傳聞佢會調任勞工處處長，多個工會講到明唔歡迎佢，叫政府換人。之後政府宣布佢會調任此職，佢連位都未坐上，已經畀勞工界數臭，仲要現任處長同勞福局常秘同佢講好說話添。

立法會人力事務委員會尋日開會，勞工處處長謝凌潔貞都有出席，既然係「大好友」，街工嘅議員梁耀忠喺會上恭喜佢升職之餘，仲乘機「詐型」，話未來勞工處處長卓永興表現實十分差，唔會好似謝太咁，一定會好少時間同民間對話、溝通。

阿忠話卓永興喺食環署嗰時約佢永遠都約唔到、好難見，又諷刺佢到時如果要見團體，可能會畀壓力下面嗰啲，叫手下「自己去見啦」。跟住阿忠爆大鑊，話曾經試過打電話畀卓永興，點知佢竟然話趕住去食飯，唔講電話喇，既然當時卓永興咁唔畀面，阿忠都不留情面咁話卓永興「咁好唔禮貌喎」。

「豬一食嘢就唔講嘢」

睇見阿忠借謝太鬧卓永興鬧得咁過癮，社民連嘅「長毛」梁國雄邊聽仲邊鬧卓永興係壞人，最後仲忍唔住講咗句「逢係豬都係咁，一食嘢就唔講嘢」，令大家捧腹大笑。

勞工界咁唔妥卓永興，睇嚟日後都好難修補關係喎！不過，眼見自己同事畀議員狂插，謝太同勞工及福利局常任秘書長鄧國威都要為卓永興講番啲好話啦。謝太話曾經同卓永興共事過，對佢有信心，又話可能佢去食飯就係同相關人士溝通呢；鄧常秘亦幫口，話：「邊個做局長、署長、秘書長，都會廣徵民意同相關人士溝通嘅。」講幾多好話都冇用㗎！邊個叫卓永興自己攞嚟衰犯眾憎吖！