政情：搞搞政：袋巾傑撐黑英踩孫公

殺校延後一年，但教育局要求多間官立中學帶頭減班，惹嚟天文台前台長、官中名校英皇書院同學會會長「黑英」林超英喺網誌炮轟，批評咁做法係違反社會公義。

公文袋嘅立法會議員袋巾傑亦好認同黑英嘅講法，但黑英呢番言論言猶在耳，點知轉個頭，傳統名校九龍華仁書院又諗住出絕招撐政府，每班中一諗住減九個學額，變相縮班。唔少名校舊生因而激到紮紮跳，都係校友嘅袋巾傑尋日就話，見到母校咁做覺得好可惜，因為九華係一間好學校，人人都爭住想入，依家要減學位，等同與民意背道而馳，實在難以理解。

袋巾傑又炮轟教育局局長孫公早前回應縮班時提出嘅「社會動盪論」，話冇辦法諗得明孫公嘅「邏輯」，唔縮班未必會令學校難以獨善其身，佢話「社會動盪論」簡直係危言聳聽。

其實孫公上場後，先有教學語言微調政策令學生無所適從，依家又爆出逼學校縮班，難怪袋巾傑都話：「再畀孫公搞教育，社會就真係動盪！」