政情：麥列菲菲藉口湊孫離英基

麥列菲菲尋日宣布，為個人專業發展同抽多啲時間陪屋企人，包括佢期待已久嘅第一個寶貝孫，決定辭任英基學校協會管理局主席，明年三月生效。佢任內對英基嘅貢獻都唔少，唔單止協助英基走出困境，仲重組以往過時兼複雜嘅協會架構。之不過佢突然辭任，莫非真係抱孫咁簡單﹖

英基早年經常被批評財務管理不善，身兼香港醫務委員會主席及私家醫生嘅麥列菲菲，自○四年起擔任英基學校協會管理局主席，當時英基陷入困境，喺佢在任期間，不但促成立法會通過一項修訂條例草案，令原本過時同複雜嘅協會架構，改組成一個由直選家長代表、獨立成員、校董會主席委員會代表同職員代表組成嘅全新管理局。

麥列菲菲形容依家請辭係最恰當嘅時間，又話：「我已出任咗差唔多七年主席，七年係一段唔短嘅時間，我希望將來可以有更多時間陪屋企人。」英基學校協會管理局已成立遴選委員會，物色接班人。