政情：金勞詹狂轟任總海嘯論
政情：金勞詹狂轟任總海嘯論
立法會金融服務界代表「金勞詹」詹培忠，素來都好似同金融管理局前總裁任志剛水火不容咁，咪以為任總都退咗休咁耐，應該平息干戈嘞啩，點知尋日立法會質詢金管局高層離休後再就業安排時，金勞詹又乘機翻舊帳狂砌佢。
金勞詹大鬧任總喺金管局打工時經已年薪近千萬元，但係離開唔夠一年就去咗三間公司做非執董；唔單止咁，佢對任總前排警告金融海嘯第二波非常有意見，事關任總嘅言論影響銀行貸款畀中小企，金勞詹直頭隔空質問任志剛：「金融海嘯第二波嚟緊？喺邊度？攞出嚟睇呀！」又要求財爺鬍鬚曾限制任總嘅言論。
講到限制言論自由咁離題，立法會主席忍唔住開聲阻止金勞詹，金勞詹唔服，即時反駁「主席你畀司長答啦，唔好代佢揸主意」。金勞詹發揮咗一輪言論自由，鬍鬚曾勉強回答，話睇唔到金勞詹講嘅問題，而且任總係有言論自由嘅。
金勞詹又向任總開火，仲話要限制任總嘅言論。