政情：鄧鉅明宴賀金刀梁受勳

身兼行政會議成員嘅泌尿科聖手「金刀梁」梁智鴻獲頒大紫荊勳章，勳章未到手，繼醫學界好友喺八月底已大排筵席賀佢後，太子珠寶鐘錶主席鄧鉅明夫婦亦拉大隊宴請佢，揀咗足球總會董事余錦基開設嘅私房菜「軟庫飯堂」開餐，話明係喜事，當然要攞個好意頭，歎番碗飯堂鎮店嘅六十年陳皮紅豆沙喇！

日前晚上近八點鐘見鄧鉅明夫婦、太子珠寶鐘錶執董朱繼陶夫婦、市場部經理蘇嘉寶、「媽打」李麗娟同名媛林李婉冰等到「軟庫飯堂」，鄧太仲手持一個意大利時裝品牌DOLCE & GABBANA大紙袋，話係送畀金刀梁嘅禮物，內裏包括一條男裝領呔。

尋日又喺畢打街遇到金刀梁，問佢點解唔戴鄧鉅明夫婦送贈嘅D&G領呔，佢就笑笑口話：「佢哋真係好客氣，條呔好靚，好啱我心水，但靚嘢唔捨得戴出街嘛！」

當晚媽打透露現正協助母校瑪利諾修院學校（Maryknoll）籌款，計劃讓校友認購學校嘅木櫈，每張五萬元，捐款人可在櫈上刻上紀念字句，佢仲率先聯同幾個姊妹認購咗一張，善款用作聘請更多優質老師，令一眾師妹受惠。