政情：楊鼎立神奇手帶揭秘

近排Grounded手帶風靡社交圈，但手帶並冇專門店，背景好神秘。明查暗訪下，原來手帶係由已故全國政協副主席安子介外孫Derek楊鼎立代理，佢話多得一位新加坡老友介紹，一夜之間點「帶」成金。

早幾日下晝喺中環見Derek戴住白色Grounded行街，原來佢代理條手帶四個幾月，目前係香港同南中國代理。呢條手帶冇賣廣告仍然喺名人二代圈子中熱爆，Derek都話好驚訝，但講到開設專門店，佢就話要諗吓先，又話：「港人對潮物嘅熱情來得快，去得快；推得太急，產品死得更快。」

除咗喺朋友間推廣，Derek近日接到一個大客仔，就係香港高爾夫球會。佢話唔少球手覺得戴咗手帶打波，平衡力好咗，所以計劃將手帶推薦畀更多球會，又會考慮將手帶擺喺高級超市賣。

到底手帶有乜秘密？Derek揭開真相。原來手帶內有個銀色雷射貼，由美國研發製造，據講含有多種波頻，戴上後有助調節人體波頻，令人感到身心平衡愉快喎！真係信唔信由你。