政情：富貴黨忽然民生 爆兩條路線鬥爭

富貴黨爆內訌風雲震撼政壇，副主席張宇人同中常委田北辰大鬥法，迫使田二少退黨，經前主席田北俊等最高層全力斡旋，風波雖暫告平息，但政治後遺症肯定手尾長。呢次風波涉及黨內部對走直選路線嘅分歧，適逢尋日立法會開星期三大會，仲係富貴黨主席Miriam劉健儀提出狠批社福安全網千瘡百孔嘅動議辯論，仲係破紀錄有十個修訂動議，原來諗住呢個一拖十嘅格局肯定鬧爆政府扶貧不力，點知富貴黨變咗自討苦吃，畀泛民主派揶揄佢哋走直選路線係「忽然民生」。

被寸吼直選票源

白鴿黨黃成智話普選真可愛，富貴黨為咗直選，過往好少提民生議案，今日都要提。街工梁耀忠亦加多腳：「今日真係好罕有，由富貴黨主席劉健儀提出一個咁民生嘅議案，唔再只係為業界講嘢，而係為基層作主。」社民連陳偉業更露骨，話富貴黨為全面直選開拓票源，先至提呢個動議。

唉！喺咁嘅形勢，富貴黨除咗捱打之外，都冇乜嘢做到，對於內訌風波就更加封晒口。被問及田北辰退黨傳聞，Miriam就話冇嘢發生過，仲叫記者問田二少添，跟住就封口唔答。

廿蚊張唔認內訌

兩位副主席方剛同「廿蚊張」張宇人亦全面否認內訌。就最低工資同大家樂扣飯鐘錢風波，同田二少頂到行嘅廿蚊張，話同田二少相識四十年，從未嗌過交，又讚二少「份人好斯文」。記者問黨內係咪好多人不滿田二少，佢話：「我唔清楚喎。」

方剛就話富貴黨冇炒大鑊，田二少同廿蚊張只係理念有少少唔同，被問到田二少喺黨內係咪好霸道，佢只係支吾以對：「唔……佢（田二少）比較有理念……」。有傳事件驚動中聯辦調停？方剛答得仲妙：「係咩？我冇入中聯辦。」富貴黨高層擺明係冚實單嘢啫！