政情：搞搞政：鬍鬚曾扮任總冇料到

呢幾日「孖曾」先後都講過樓市，煲呔曾早幾日突然公開話會喺冇預告嘅情況下打壓投機炒賣活動，而佢嘅「真兄弟」財爺鬍鬚曾前日仲喺佢個人網誌話有需要時會出招。鬍鬚曾尋日以署理行政長官身份喺香港按揭證券公司董事會會議後見傳媒，大家一心以為會公布相關嘅措施啦，點知係虛驚一場，佢只係公布咗中小企融資計劃。

位置敏感引傳媒注意

點解大家咁煞有介事？主要係地點嘅問題。以往金融市場有乜風吹草動，金管局前總裁任志剛都會喺國金中心大堂同記者講幾句，但自從「攞命陳」陳德霖舊年十月上任總裁後，已經冇咗呢個習慣，至今用過呢度見記者一次咁大把嘅就係月初美國公布QE2嘅時候。雖然係咁，呢個位置喺傳媒心目中嘅地位仍然係咁特殊。

所以鬍鬚曾尋日又喺任總以前企開嘅地點見記者，連接近政府消息人士都估計，今次會講關於按揭嘅嘢或者公布一啲敏感消息，但最終關於樓市嘅只有「我哋會密切留意，有需要時會推出適當措施」呢兩句咁大把，完全冇料到。

係咪想扮任總吸引傳媒注意？咁就要佢先知嘞！但表面嚟睇，佢擺明係想借呢個地點搵傳媒嚟幫佢抬轎，簡直離晒大譜！再講，金管局總裁都係佢下屬，若果佢扮任總的話，咪即係「降呢」囉！