政情：浸大超級派對逼滿名人

逾百政商名人尋日逼爆浸會大學校園，事關浸大搞咗個超級派對，同時舉行畢業禮、校長就職同埋榮譽博士頒授儀式，仲有獲頒榮譽博士學位嘅外交部前部長李肇星同全國政協委員KK王國強，真係盛況空前。

現場仲見到好多間大學嘅校長添！點解？原來浸大為咗慶祝陳新滋就職，今日將舉行「大學校長論壇—全球化時代的通識教育」，嚟自中、港、台、歐美同亞洲逾五十所大學嘅校長、副校長都嚟參加，為數多達百幾人，所以尋日出現咗咁墟冚嘅場面。

獲頒社會學博士學位嘅KK可謂人氣爆燈，排住隊同佢影相祝賀嘅城中名人，數極都數唔晒，最難得係KK全家三代扶老攜幼齊現身，加埋大仔新抱嘅BB年底就嚟出世，將升格做爺爺嘅佢真係威到盡。

好多人就一石多鳥，一次過撐幾個人，好似有「樓神」稱號嘅長實執董趙國雄、長江製衣創辦人陳瑞球咁，都係嚟撐幾大「人氣王」。出名幽默機智嘅李肇星，雖然冇太多親友嚟見證開心時刻，但佢隨後喺浸大有場講述外交生活點滴嘅演講，好多名人、同學慕名而嚟，逼到會場水洩不通，受歡迎程度直逼大明星。