政情：德成局長狡辯撐申亞

政府早前劈價，將申辦二○二三年亞運會嘅成本減至六十億元，有人擔心政府同今屆投資咗逾千億搞亞運嘅廣州比，只能搞個寒酸亞運出嚟，失禮街坊。民政事務局局長曾德成尋日自行解畫，但竟然將十大基建嘅開支同亞運開支掛鈎，話今次廣州亞運總共用咗九成開支出嚟搞基建，而本港未來同樣會投放逾千億喺十大基建度，大家不相伯仲，唔會被比下去。乜條數可以咁計嘅咩？呢種講法近乎狡辯！

香港青年聯會尋日搞咗個地區諮詢會，聽取年輕人對申亞嘅意見。除咗有德成局長喺度死雞撐飯蓋外，都有啲人幫腔嘅，主辦單位青聯主席陳仲尼力撐申亞，話港人唔應該只從成本角度出發，而忽視咗亞運可為本港帶嚟嘅機遇。曾經勇奪第九屆全運會單車賽金牌嘅何兆麟，亦猛話搞亞運有助推動運動精英化，藉此提高運動員水平。

雖然大會今次美其名要聽取年輕人意見，但其實都係台上嘉賓噴口水多，台下學生最終得兩人有機會發問，仲有啲學生悶到喺度釣魚。