政情：蘇菲講古仔撐發叔
政情：蘇菲講古仔撐發叔
立法會尋日討論行政會議成員劉皇發漏報利益單嘢，泛民空群而出鬧爆政府，唯獨同發叔同屬經濟動力嘅「蘇菲」梁劉柔芬撐住，仲不惜將發叔嘅媽媽都搬埋出嚟添！
作為議員個人利益監察委員會主席嘅蘇菲，上個月委員會討論發叔單嘢時，已放棄主持會議，以示公允，只係唔避席啫。尋日佢再度君子協定，講明雖然同發叔交情非常之深，但一定會秉公說話，若然有人覺得佢偏私，大可以直斥其非。
之後蘇菲就話，佢聽過新界鄉親講發叔媽媽好鍾意坐喺屋企門口嘅大笪地曬太陽，有時村民經過，會提議發叔媽媽買起佢哋幅地，等村民有錢周轉，難怪發叔唔知原來有啲地係自己嘅。佢仲話發叔人格係點大家有目共睹，當初政府委任佢入行會時，大家都好似冇乜微言，所以大家都係向前望啦！蘇菲講到咁，唔怪得政制及內地事務局局長林瑞麟亦無話可說。